m's

Vendimet që duhen marrë rreth 5 M-ve të reklamimit

Janë 5 vendime që duhen marrë rreth atyre që quhen 5 M-të e reklamimit: misioni, mesazhi, media, monedha (money), matja.

Misioni mund të jetë: informues, bindës, kujtues apo përforcues. Me një produkt të ri, kompania normalisht duhet të informojë dhe/ose të bindë. Me një produkt të vjetër, si Coca Cola, kompanisë i duhet të kujtojë. Me produkte të tjera që kanë nisur të shiten, duhet të sigurohen blerësit që kanë bërë një blerje të mirë, me anë të një reklame përforcuese.

Mesazhi duhet të komunikojë vlerën e dallueshme të markës përmes fjalëve dhe imazheve. Disa pyetje që duhet t’i përgjigjemi rreth mesazhit, janë:

1. Cili është mesazhi kryesor që merret nga reklama?

2. Çfarë kërkojmë ne që audienca të dijë, bëjë apo të besojë?

3. Sa e mundur është që reklama të influencojë audiencën për marrjen e një vendimi?

4. Cilat janë pikat e forta dhe të dobta të reklamës?

5. Si do i bëjë reklama të ndihet audienca?

6. Cili është vendi/ambjenti i duhur për shfaqjen e reklamës?

Media ku do të reklamohet, duhet zgjedhur sipas aftësisë së saj për të arritur audiencën tonë të targetuar, me një efiçencë sa më të lartë. Përveç mediave tradicionale si gazetat, revistat, radio, TV dhe billboardet, tashmë gjerësisht përdoret rryma e mediave të reja, përfshirë emailin, telemarketingun, gazetat dhe revistat online, reklamimin në pikën e shitjes apo edhe reklama në ashensorë, tavolina lokali, etj. Me gjithë këto mundësi, zgjedhja e medias së duhur është bërë një sfidë madhore. Përveç zgjedhjes së medias, duhet përcaktuar edhe madhësia e audiencës së synuar për t’u arritur, sa shpesh do të shfaqet, oraret, etj. Supozojmë që dëshironi që reklama juaj të shihet të paktën nga 50% e një targeti prej 1 milion njerëzish. Kjo do të thotë 500 mijë shfaqje. Por ju do të donit që mesatarisht çdo person ta shohë 3 herë reklamën gjatë fushatës. Kjo e çon numrin e shfaqjeve në 1.5 milionë. Por mund të duhen 6 shfaqje të reklamës për çdo person që mesatarisht ai t’i kushtojë vëmendje reklamës 3 herë. Kjo do ta çonte numrin e shfaqjeve në 3 milionë. Tani supozojmë që dëshironi të përdorni një media (billboard) që kushton 20 euro për 1000 shfaqje. Në këtë rast fushata do të kushtonte në total: 20*3,000,000/1000 = 60,000 euro. Duke bërë krahasime të tilla të kostove me shikueshmërinë, mund të zgjidhet një media tjetër që me 60,000 euro do të arrinte një shikueshmëri më të lartë. Shpesh, duhen bërë kompromise midis shikueshmërisë, impaktit të medias dhe buxhetit.

Monedha (money) siç e pamë më lart përdoret për të paguar median në të cilën shfaqet reklama jonë. Por paratë janë të rëndësishme edhe për prodhimin e reklamës dhe të kostove të tjera. Prodhimi i reklamës mund të bëhet brenda për brenda kompanisë, por edhe duke nënkontraktuar një firmë të specializuar reklamimi. Në rastin e dytë, pagesa e asaj firme këshillohet të bëhet mbi bazën e “pagesës sipas performancës”. Kjo do të ishte e logjikshme, sepse një reklamë që nuk rrit shitjet e kompanisë, me shumë mundësi nuk është realizuar si duhet (duke mos marrë parasysh faktorë të tjerë që ndikojnë tek shitjet – dhe firma reklamuese do të thotë që faktorët e tjerë kanë ndikuar dhe jo reklama e prodhuar prej tyre). Pra, kjo nuk do të thotë që nëse shitjet nuk ecin mirë firma që prodhon reklamën të mos paguhet fare, por pagesa duhet të variojë me përqindje.

Matja është një element i rëndësishëm e gjithë procesit për të parë rezultatet e një fushate. Për më tepër është mjaft e vështirë për të matur saktësisht ndikimin e një reklame tek perceptimi i audiencës për produktin tonë apo tek ecuria e shitjeve. Për shembull, si mundet Coca-Cola të masë ndikimin e një reklame të saj në formë fotoje të një kanaçeje në kopertinën e pasme të një reviste, në të cilën kompania ka shpenzuar 70,000 dollarë? Nëse një kanaçe kushton 70 cent dhe fitimi i kompanisë është 10 cent për copë, atëherë ndikimi i asaj reklame duhet të sjellë shitjen e 700,000 kanaçeve plus për kompaninë! Nëse bëjmë llogari të tilla, mund të kuptojmë që shumë reklama nuk arrijnë ta mbulojnë koston e tyre, por megjithatë kompanitë duhet të përpiqen të bëjnë matjet e tyre, nëpërmjet anketave, krahasimit të ecurisë së shitjeve dhe në rastin e mediave online, mund të përdoret sistemi i pagesës për çdo klikim real në reklamë.

Sa duhet të shpenzojmë për reklama? Nëse shpenzojmë shumë pak, atëherë jemi duke shpenzuar shumë, pasi askush nuk do e vërë re reklamën. 1,000 euro reklamë televizive, vështirë se do të vihet re. Nga ana tjetër nëse shpenzojmë shumë, fitimet do të vuajnë. Kjo është puna e atyre që punojnë me reklamat. Të gjejnë ekzaktësisht të mesmen e artë, ku fitimet mbahen brenda objektivave, ndërkohë që mesazhi i reklamës përcillet siç duhet.

Por nëse kompania shpenzon shumë para për reklamim dhe anashkalon elementët e tjerë të marketingut, atëherë sigurisht që reklamimi do të ishte një investim i gabuar. Departamenti i marketingut duhet të bëjë kujdes po aq sa me reklamimin edhe për imazhin e markës, paketimin, krijimin e një produkti perfekt, publicitetin pozitiv, marrëdhëniet publike, shërbimin dhe trajtimin e klientëve, përfshirë këtu mënyrën se si flisni në telefon dhe se si i buzëqeshni atyre.

Një mendim mbi “Vendimet që duhen marrë rreth 5 M-ve të reklamimit

  1. Pershendetje!

    ju lutem mund te me jepni nje informacion rreth rolit te medias ne vendimmarrje si pushtet i katert, por qe te kete lidhje me financat publike. Faleminderit. Mbetem ne pritje te emailit tuaj.

    ________________________________

Lini një Përgjigje

Plotësoni më poshtë të dhënat tuaja ose klikoni mbi një nga ikonat për hyrje:

Stema e WordPress.com-it

Po komentoni duke përdorur llogarinë tuaj WordPress.com. Dilni / Ndryshojeni )

Foto Twitter-i

Po komentoni duke përdorur llogarinë tuaj Twitter. Dilni / Ndryshojeni )

Foto Facebook-u

Po komentoni duke përdorur llogarinë tuaj Facebook. Dilni / Ndryshojeni )

Foto Google+

Po komentoni duke përdorur llogarinë tuaj Google+. Dilni / Ndryshojeni )

Po lidhet me %s