Të bësh biznes nëpërmjet telefonit

3 Maj, 2012 Lini një koment

Kur nuk keni mundësi për të takuar një person, ju sigurisht shfrytëzoni rrugët e tjera të komunikimit. Prandaj përdorni këshillat apo rregullat e mëposhtme për të ndërtuar marrëdhënie dhe komunikim të mirë dhe të qartë edhe përmes bisedave telefonike.

Në rrugën e biznesit nuk është i rrallë vlerësimi se nuk ka aftësi më të rëndësishme për suksesin e një biznesi se sa aftësia për të ndërtuar marrëdhënie të mira qoftë edhe gjatë një bisede telefonike. Nëse nuk mund t’i shtrëngoni duart me dikë apo ta shikoni në sy, duhet të jeni të aftë që të komunikoni dhe ta bindni atë për besueshmërinë dhe seriozitetin e punës.

Shumë njerëz në biznese nuk kanë asnjë ide se si tingëllojnë gjatë një bisede telefonike. Për fat të keq, ata mund të tingëllojnë si idiotë apo si një robot, duke folur shpejt, pa ndërlidhje logjike dhe pa një intonacion që tingëllon ‘zyrtar’. Është humbje e madhe për biznesin nëse njërzit nuk i përdorin shkathtësitë komunikuese dhe të zgjedhin fjalët në mënyrë aktive për të krijuar një lidhje të mirë me personin e anës tjetër të linjës.

Për të parë nëse jeni duke u sjellur bezdisshëm, regjistroni disa biseda dhe kontrolloni më pas. Kontrolloni nëse keni thënë “uh…” në mesin e çdo fjalie! Shembulli më i mrekullueshëm është nëse ju jëni shprehur në fund falënderues dhe jeni përshëndetur më mirësjellje. Kur pauzoni pak para se të përgjigjeni, personi tjetër e kupton që ju e keni dëgjuar me vëmendje. Nëse, ndodh e kundërta që ju të kërceni menjëherë më reagimin tuaj, bashkëbiseduesi lehtë mund të tërhiqet duke aluduar në mungesë serioziteti në punë apo profesionalizmi.

Asnjëherë mos bëni biseda telefonike për biznes pa e ditur saktësisht se për çfarë jeni duke u marrë vesh konkretisht. Duhet pasur parasysh se shumë barriera shmangen kur takoheni personalisht, por shumë të tjera krijohen nëse e kryeni një punë përmes telefoni. Kur jeni përballë me bashkëbiseduesin, ju e keni vëmendjen e plotë ndaj tij, për dallim nga kontaktet me email, telefon apo kanal tjetër komunikimi.

Shumica e punëve edhe në biznes sot kryhen përmes telefonit. Por, duhet pasur kujdes që gjatë një bisede telefonike me personin tjetër përqëndrohuni dhe dëgjoni çfarë thotë ai. Sepse, shumica e njerëzve nuk mund ta dëgjojnë se çfarë është duke thënë personi tjetër.

Gjatë komunikimit me telefon është shumë e vështirë për ta kapur nuancën e bisedës, prandaj kërkohet përqëndrim shumëfish më i shtuar. Sidomos për faktin që mund të jeni të shpërqëndruar nga vulgu i punës dhe duhet të përgjigjeni në një bisedë telefonike me një klient, partner apo palë tjetër relevante në biznes./profit.al/

Vënë nën Këshilla Etiketuar me , , , , ,

Disa ide të pakushtueshme marketingu për bizneset e vogla

28 Mars, 2012 Lini një koment

Për shkak të kapitalit të paktët si monetar edhe në burime njerëzore, bizneset e vogla duhet të tregohen të zgjuara dhe strategjike në përpjekjet e tyre për të krijuar një marketing efektiv.

Kemi parasysh këtu që marketingu dhe reklamat janë një ndër zërat kryesorë në shpenzimet e një biznesi. Por jo vetëm që këto shpenzime janë më të kushtueshmet, por janë edhe më të rëndësishmit. Kthimi i investimit mund të vonojë ose të dështojë tek një biznes që nuk hedh hapat e duhura në marketing. Tek bizneset e vogla, nuk është e domosdoshme të shpenzohen para pa fund për një proces të tillë, por gjithsesi duke i kushtuar rëndësi disa detajeve të rëndësishme, mund të arrihet një marketing i suksesshëm me buxhet minimal, për të përmirësuar imazhin e kompanisë.

Me këto në mendje, më poshtë po tregoj pesë mënyra se si mund të arrihet një marketing i mirë, duke shpenzuar vetëm disa para xhepi:

  1. Kartvizitat e biznesit. Vetëm sepse një biznes është i vogël nuk do të thotë që të mos ketë një imazh të fuqishëm. Pavarësisht industrisë së kompanisë tuaj, kartvizitat e biznesit duhet të reflektojnë gjithmonë profesionalizmin, stilin dhe mbi të gjitha të projektojnë suksesin e biznesit tuaj. Zgjidhini kartvizitat me zgjuarsi. Merrni në konsideratë llojin e letrës, logon, ngjyrat dhe përmasat. Për shembull, mund të vendosni për një kartvizitë dy anëshe, në të cilën nga njëra anë shkruhen informacionet e kontaktit dhe nga tjetra detaje mbi produktet apo një minihartë të biznesit tuaj. Mundësitë e zgjedhjeve dhe alternativave janë të pafundme.
  2. Firmosja e emaileve. Si një nga format më të përdorshme dhe të preferuara të komunikimit, njerëzit dërgojnë me dhjetra të tillë çdo javë dhe deri në qindra në muaj. Për më tepër emailet që ne dërgojmë shpesh kalohen (forward) tek persona të tjerë. Prandaj, është një ide shumë e mirë që të shtoni një “signature” standarde në fund të emaileve që dërgoni në mënyrë që ju dhe biznesi juaj të ekspozoheni më shumë. E mira është që të përfshini në të emrin tuaj, biznesin dhe/apo website-in e biznesit tuaj, ndonjë numër telefoni, sllogan apo sllogan. Nëse nuk keni një tashmë, futuni në llogarinë tuaj, shkoni në opsionet/preferencat/rregullimet dhe ndryshoni “Signature”. Kaq, është e thjeshtë.
  3. Rrjetet sociale. Gjatë përpjekjeve tuaja për ta bërë biznesin tuaj të njohur, nuk duhet harruar përdorimi i rrjeteve sociale si Facebook, Twitter, Linkedin, Google+, etj. Në këto faqe ju mund të publikoni gjithçka, që prej eventeve speciale, ofertat, shitjet, apo llojet e produkteve dhe shërbimeve. Më së shumti mund të komunikoni me klientët tuaj eksistues, por edhe potencialë të ardhshëm. Gjithashtu, edhe gjetja e bashkëpunëtorëve ndër rradhët e biznesmenëve të tjerë është një mundësi e mirë që ofrojnë këto rrjete.
  4. Bisedat me njerëzit. Si lidhet kjo me marketingun efektiv? E thjeshtë. Sepse fjala e gojës është një ndër format më të mira të publicitetit. Kur një klient kënaqet nga shërbimi juaj, ai do t’u thotë miqve, familjes, etj. Edhe këta të fundit do të bëjnë të njëjtën gjë e në vazhdim. Pra, edhe ju mund të flisni me të tjerët për biznesin tuaj, seriozitetin dhe cilësinë e tij. Një klient i pakënaqur e shpërndan shumëfish eksperiencën e tij të keqe me të tjerët, kështu që kujdes nga gabimet me klientët.
  5. Blogu. Një i tillë mund t’i japë një biznesi të vogël mundësi të shumëfishta. Përmes një blogu bizneset mund të promovojnë produkte të reja, të ndajnë eksperiencat e mira të klientëve, të publikojnë fotografi, të organizojnë konkurse të ndryshme, apo të shkruajnë artikuj me interes rreth industrisë apo produkteve të tyre. Për më tepër, blogjet janë të pakushtueshme për t’u zotëruar dhe për t’u mirëmbajtur. Që frytet e një blogu të tillë të duken, sigurohuni që ta përditësoni vazhdimisht. Nëse ende nuk keni një blog për biznesin tuaj, mund të hapni falas një të tillë. WordPress.com dhe Blogger.com janë ndër platformat më të mira që ofrojnë një shërbim të tillë.

Mbani në mendje këto këshilla, por mos u limitoni vetëm tek to. Për një biznes të vogël që kërkon të realizojë një marketing të mirë, janë shumë të rëndësishme të gjitha detajet. Pra, mendoni për mjete të tjera dhe për taktika të tilla të pakushtueshme, por që e ndihmojnë biznesin tuaj më shumë nga çdo e kishit menduar.

Vënë nën Këshilla, Marketing Etiketuar me , , , ,

Cilësitë që e bëjnë një drejtues të shkëlqyer

12 Mars, 2012 Lini një koment

Nuk mund ta dallosh nga letrat nëse një person është apo do të ishte një drejtues i shkëlqyer. Ata dallohen nga veprat. Rezultatet e treguara prej tyre janë gjithçka. Më poshtë po listoj 5 gjëra që një drejtues mund të bëjë për t’u konsideruar i shkëlqyer dhe për të tërhequr pas vetes punonjësit e tjerë dhe të gjithë biznesin drejt suksesit:

1. Zhvillimi i çdo punonjësi. Çdo drejtues duhet të mbajë në mendje se përveç detyrave tradicionale të tij (si për shembull rritjen e shitjeve, prodhimin sipas objektivave, përmirësim të shërbimit, etj) ka edhe për detyrë që të zhvillojë punonjësit. Është përgjegjësi e drejtuesit, të trajnojë, këshillojë dhe të zhvillojë vartësit e tij. E bukura është që ndërsa drejtuesi bën këtë, përveç punonjësve, ndihmon automatikisht edhe veten edhe biznesin drejt realizimit të objektivave dhe qëllimeve. Prandaj, vetëm një drejtues që e kupton rëndësinë e zhvillimit të punonjësve dhe e realizon me vepra këtë gjë, mund të jetë i shkëlqyer.

2. Përballimi i menjëhershëm i problemeve. Asgjë nuk është më e rëndë për moralin e një grupi sesa problemet e paadresuara. Probleme ndërpersonale, çështje të performancës, konflikte midis departamenteve, të gjitha ndikojnë negativisht tek entuziazmi dhe motivimi i punonjësve. Ata shpërqëndrohen sepse problemet e vogla nuk të lenë kurrë të qehtë dhe nuk largohen kurrë. Përkundrazi është shumë e thjeshtë që problemet e vogla të kthehen në të mëdha. Për më tepër kur drejtuesi e injoron një problem, ai humbet respektin e punonjësve dhe pa respekt, askush nuk mund të drejtojë. Nuk duhet shpresuar asnjëherë që një problem do të zhduket vetëvetiu, apo që dikush tjetër do të merret me të. Drejtuesi duhet të përballet me çdo problem me seriozitet, sado i vogël e i parëndësishëm të duket ai.

3. Shpëtimi i punonjësve “të këqinj”. Pothuajse çdo biznes ka nga të paktën një punonjës që ka bërë ndonjë gabim të dukshëm në punën e tij. Mund të ketë dështuar në plotësimin e një detyre, mund të ketë humbur qetësinë gjatë një mbledhjeje, ose thjesht mund të mos jetë dot në një hap me të tjerët. Me kalimin e kohës, një punonjës i tillë shihet nga të tjerët si një “pikë e dobët”. Po ndodhi kështu, sado të përpiqet punonjësi për t’u përmirësuar, presioni i të tjerëve mbi të është shumë i rëndë për ta bërë atë të mundur. Këtu fillon puna e një drejtuesi të shkëlqyer. Ai duhet ta mbështesë punonjësin, t’i thotë që e di që po përpiqet dhe se do ta ndihmojë për ta kaluar atë situatë. Duhet të jetë sigurues dhe t’i jap besim punonjësit të dobët. Kjo nuk nënkupton uljen e standardeve të kompanisë dhe pranimin e një performance më të dobët nga ai punonjës. Përkundrazi, nga këshillimi drejtuesi duhet të presë që punonjësi jo vetëm të arrijë në nivelin e të tjerëve, por edhe t’i kalojë ata. Kjo, sepse dëshira dhe vullneti i tij janë të provuar dhe me rritjen e mundësive, do të rritet edhe performanca e tij. Ndonjëherë kujdesi ndaj një punonjësi të tillë nuk do të ketë sukses, por një drejtues i shkëlqyer e provon gjithmonë.

4. Shërbim të tjerëve, jo vetes. Kur dikush tregohet mendjemadh, egoist apo sheh interesin personal mund t’ia hedhë disa herë, por përfitimet e tij janë afatshkurtra. Një drejtues i shkëlqyer nuk duhet të mburret për aftësitë e tij, apo të marrë meritat e një apo disa punonjësve të tjerë. Nuk duhet lavdëruar vetja për asgjë. Suksesi vjen nga veprimet dhe jo nga ato që thuhen. Kur një punonjës shkëlqen, edhe biznesi bashkë me drejtuesin shkëlqen. Kur një ekip ia del mbanë, edhe biznesi me drejtuesin ia dalin mbanë. Por në këto raste nuk duhet që drejtuesi të përgëzojë veten për mbështetjen që i ka dhënë, por ata, punonjësit. Një drejtues i shkëlqyer të paktën do të vepronte kështu.

5. Të kujtosh gjithmonë nga ke ardhur. Mund të ndodhë të shohësh një sportist të famshëm që i kthen shpinën dikujt që i kërkon autograf. Dikush mund të mendojë, “Nëse do të isha në vend të sportistit, nuk do ta bëja kurrë diçka të tillë.” Por në fakt, shumica e drejtuesve bëjnë me punonjësit atë që sportisti bën me fansin e tij. Së pari është fakt që drejtuesi të jenë të famshëm brenda kompanisë, prandaj punonjësit edhe kur thonë se duan të flasin diçka me drejtuesit , në fakt ata mund ta bëjnë vetëm sepse kërkojnë të kalojnë pak kohë me ta. Kur vjen një kërkesë e tillë, drejtuesi ka dy zgjidhje. Mund t’i kthejë kurrizin dhe ta refuzojë. Ose, mund të përfitojë nga ai moment për të motivuar, këshilluar, e ofruar shpresë për atë punonjës. Nuk duhet harruar që: Sa më shumë ngjit shkallët dikush, aq më tepër ndikim dhe përgjegjësi ka ai tek/për të tjerët më poshtë. Mënyra se si një drejtues e shfrytëzon këtë gjë, bazuar në cilësitë e mësipërme, përcakton a kemi të bëjmë me një lider të shkëlqyer apo jo.

Vënë nën Këshilla, Menaxhimi Etiketuar me , , , , ,

Çfarë mund të mësojnë meshkujt nga femrat rreth planifikimit strategjik?

8 Mars, 2012 Lini një koment

Jennifer Houser

Nga Jenn Houser – Para disa ditësh, takova Benin, i cili ka qenë duke punuar për 10 muaj rreth idesë së tij të parë për të ngritur një biznes. I kërkova të më përmblidhte në dy minuta idenë e tij. Beni shpenzoi në fakt dhjetë minuta duke më treguar gjithçka rreth produktit të tij, me një pasion të paparë. Më pas i drejtova disa pyetje rreth modelit të biznesit, konkurrentët, nevojat e klientëve dhe planin e marketingut. Por ai nuk mundi t’i përgjigjej asnjërës prej atyre pyetjeve dhe vazhdoi të fliste akoma më tepër rreth produktit të tij. Pastaj e pyeta nëse ka një plan biznesi. Më tha që jo, por do ta bënte sapo të ishte gati për të gjetur financime. E pyeta se si ai i merrte vendimet pa patur një plan biznesi. Fytyra e tij shkëlqeu dhe më tregoi të gjitha gjërat që do t’i shtonte produktit në vazhdim.

Më në fund, Beni më pyeti se çfarë mendoja për idenë e tij. Me mirësjellje, iu përgjigja se mendoja që ai ishte duke e planifikuar kompaninë e tij duke përdorur stereotipin mashkullor të të bërit të gjërave. Duke mos ndaluar kurrë për t’u orientuar apo për t’u siguruar që po ecën në drejtimin e duhur. I thashë që ai duhej të planifikonte si një femër.

Ja se çfarë kisha parasysh me këtë, nga e cila dalin në pah edhe pikat e forta të një femre që planifikon, krahasuar me një mashkull:

Hartoni një plan përpara se të filloni. Nëse po planifikoni një biznes, ju duhet një plan biznesi, të cilin duhet ta keni të shkruar. Jo, nuk është e nevojshme të shkruani 40 faqe në word të cilat askush nuk ka për t’i lexuar kurrë. Megjithatë, duhet të krijoni rreth 15 slide në PowerPoint që të mbulojnë të gjithë elementët kyç të një biznesi, përfshirë një rrugë të qartë rreth mënyrës se si do të ndërtohet ai në vitet e para të jetës. Ky duhet të jetë hapi i parë për të nisur një biznes të suksesshëm dhe të qëndrueshëm.

Pranoni gjërat që nuk i dini. Askush nuk i di të gjitha që duhet për të nisur dhe drejtuar një biznes. E rëndësishme është që të kuptoni se çfarë dini tashmë, se çfarë nuk dini dhe se si do të mbushni këto të fundit. Për shembull, nëse ju duhet ndihmë për të hartuar një plan biznesi, flisni me ata që e kanë bërë para jush. Do të kurseni shumë kohë dhe do të keni mundësi të shmangni disa hapa të gabuara të shpeshta. Ose, duke hartuar planin tuaj mund të kuptoni që biznesi ka nevojë për të përdorur marketingun konsumator, rreth të cilit ju nuk mund të vini dorën në zjarr për asgjë. Planifikoni pra që të gjeni një partner për t’u marrë me këtë pjesë. Dhe nëse nuk jeni të sigurt se cili segment i konsumatorëve do të blejë produktet tuaja, flisni me dikë që ka shitur diçka të ngjashme më parë se ju.

Kërkoni ndihmë gjatë rrugës. Pasi ta keni gati planin, duhet të flisni me të tjerët për të marrë një feedback, mendimet e tyre. Njerëzit me të cilët mund të flisni rreth kësaj janë investitorë në kompani të ngjashme, ata që e njohin mirë industrinë dhe klientët. Ka shumë mundësi që të dëgjoni fjalë të mira, por sigurohuni që t’i kushtoni vëmendje kritikave negative të tyre dhe t’i pyesni për ndonjë zgjidhje të mundshme. Kjo është një mënyrë e mirë për të gjetur bashkëpunëtorë, investitorë, partnerë dhe më shumë. Shumë prej tyre do të të japin një përgjigje që do t’ju ndihmojë të shkoni aty ku dëshironi.

Jini të gatshëm të ndryshoni mendjen. Kur merrni feedback, mos nguroni për ta ndryshuar planin fillestar. Mos u shqetësoni, sepse kjo është normale dhe në çdo fillim plani ndryshon disa herë. Ka rëndësi të madhe që ta vlerësoni informacionin e marrë sa më saktë dhe të bëni ndryshimet e duhura. Mos bini pre e çdo ideje që për një çast mund t’ju duket interesante dhe thoni “jo” ose “jo tani” për disa nga këshillat që merrni. Është e rëndësishme të keni planin e duhur dhe të keni mundësi për ta përmirësuar deri në atë pikë sa t’ju mundësojë arritjen e qëllimeve të biznesit.

Jennifer House është një sipërmarrëse e shumëfishtë dhe një konsulente për nisjet e bizneseve. Ajo ka themeluar pesë kompani dhe ka mbledhur më shumë se 40 milionë USD nga investitorët që ka gjetur. Krijimi i saj i fundit, Motionbox, u ble nga HP në vitin 2010.

Vënë nën Këshilla, Sipërmarrje Etiketuar me , , , , , , ,

← Postime më të vjetra

Ndiqe

Get every new post delivered to your Inbox.

Join 334 other followers